ភ្នំពេញ៖ រដ្ឋលេខាធិការក្រសួងសង្គមកិច្ច និងជាអគ្គលេខាធិការក្រុមប្រឹក្សាសកម្មភាពជនពិការ លោក ឯម ច័ន្ទមករា និងភរិយា បានចូលរួមរំលែកទុក្ខជូនសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ដែលបានបាត់បង់ប្អូនស្រីពៅរបស់សម្ដេចកាលពីថ្ងៃទី៣ ខែកុម្ភៈ ដោយរោគាពាធ។

ក្នុងសាររំលែកទុកចុះថ្ងៃទី៤ ខែកុម្ភៈ ឆ្នាំ២០២៣ លោក ឯម ច័ន្ទមករា និងភរិយា ព្រមទាំងថ្នាក់ដឹកនាំមន្ត្រីរាជការនៃអគ្គលេខាធិការដ្ឋានក្រុមប្រឹក្សាសកម្មភាពជនពិការទាំងអស់ មានក្តីក្តុកក្តួលរន្ធត់ចិត្តយ៉ាងខ្លាំងដោយបានទទួលដំណឹងថា លោកស្រី ប៊ុន សុថា ដែលត្រូវជាប្អូនបង្កើត និងប្អូនថ្លៃ របស់សម្តេចកិត្តិព្រឹទ្ធបណ្ឌិត និងសម្តេចតេជោ បានទទួលមរណភាពនៅថ្ងៃសុក្រ ថ្ងៃទី៣ ខែកុម្ភៈ ឆ្នាំ២០២៣ ក្នុងជន្មាយុ ៦៧ឆ្នាំ ដោយរោគាពាធ។

លោក ឯម ច័ន្ទមករា ថា៖ «មរណភាពរបស់ លោកជំទាវ ប៊ុន សុថា គឺជាការបាត់បង់ប្អូនស្រី ប្អូនថ្លៃ ឧត្តមភរិយា ម្តាយ ម្តាយក្មេក និងជីដូន ប្រកបដោយ ព្រហ្មវិហារធម៌ កតញ្ញុតាធម៌ និងជាទីគោរពស្រឡាញ់របស់ក្រុមគ្រួសារទាំងមូល និងបានលះបង់ បូជាកម្លាំងកាយ កម្លាំងចិត្ត ក្នុងការថែរក្សាបុត្រា បុត្រី និងចៅៗ ឱ្យក្លាយទៅជាពលរដ្ឋល្អក្នុងសង្គម»។

តំណាងឲ្យក្រុមប្រឹក្សាសកម្មភាពជនពិការទាំងមូល លោក ឯម ច័ន្ទមករា សូមសម្ដែងនូវក្តីក្រៀមក្រំសោកស្តាយយ៉ាងក្រៃលែង និងសូមចូលរួមរំលែកទុក្ខជាមួយ សម្តេចកិត្តិព្រឹទ្ធបណ្ឌិត និងសម្ដេចតេជោនាយករដ្ឋមន្ត្រី ព្រមទាំងក្រុមគ្រួសារនៃសព ដោយក្តីសង្វេគបំផុតនិង សូមឧទ្ទិសបួងសួងជូនដួងវិញ្ញាណក្ខន្ធរបស់លោកស្រី ប៊ុន សុថា សូមឆាប់បានចាប់បដិសន្ធិនិងបានសោយសុខក្នុងសុគតិភពកុំបីឃ្លៀងឃ្លាតឡើយ។

គួរឱ្យដឹងផងដែរថា លោកស្រី ប៊ុន សុថា គឺជាប្អូនស្រីពៅរបស់ សម្ដេចកិតិ្តព្រឹទ្ធបណ្ឌិត ប៊ុន រ៉ានី ហ៊ុនសែន បានទទួលមរណភាពនៅថ្ងៃទី៣ ខែកុម្ភៈ ឆ្នាំ២០២៣ វេលាម៉ោង ៦និង១៣នាទី ក្នុងជន្មាយុ ៦៧ឆ្នាំ ដោយរោគាពាធ។

សពត្រូវបានតម្កល់ទុកធ្វើបុណ្យតាមប្រពៃណី នៅផ្ទះលេខ៦៦ ផ្លូវលេខ៥២៨ កែងផ្លូវ២៨៥ សង្កាត់បឹងកក់ទី១ ខណ្ឌទួលគោក រាជធានីភ្នំពេញ នឹងដង្ហែរទៅបញ្ចុះនៅវត្តបុទុមវតី នៅថ្ងៃទី៧ ខែកុម្ភៈ ឆ្នាំ២០២៣៕